Առանձնացվեցին տարվա կարևոր անելիքները

ՀՀ առողջապահության նախարար Դերենիկ Դումանյանը տարեսկզբին անցկացրած գործակարգավարական խորհրդակցության ընթացքում անդրադարձավ 2013թ. համակարգի առջև ծառացած գերակա չորս խնդիրներին:

Բժշկական օգնության որակի և արդյունավետության ապահովում

Հանձնարարվեց կազմել ժամանակացույց, համաձայն որի առաջին եռամսյակի վերջում ավարտին պետք է հասցվի ըստ հիվանդությունների բուժական սխեմաների մշակումն ու ներդրումը:

Բժշկական օգնության որակի և արդյունավետության ապահովմանը մեծապես կնպաստի առողջապահության կազմակերպիչների` գլխավոր բժիշկ, տեղակալ, բաժանմունքի վարիչ, ինչպես նաև մասնագետների ատեստավորման գործընթացի ներդրումը: 

Համակարգին հատկացված միջոցներն առաջին հերթին որակյալ ծառայության ապահովմանը և բուժաշխատողների վարձատրմանն ուղղելու նպատակով 2013թ.-ի համար կնքվելիք պետպատվերի պայմանագրերում ամրագրված դրույթները հնարավորություն կընձեռեն վերահսկողություն սահմանելու ինչպես բժշկական օգնության և սպասարկման որակի, այնպես էլ` գնման գործընթացի կազմակերպման նկատմամբ:

Պայմանագրերում նախատեսված է նաև բուժհաստատություններում աշխատող բժիշկների, բուժքույրերի և մայրապետների նվազագույն աշխատավարձերի սահմանման կարգը: 

Մարզերի համաչափ զարգացում

Նախարարի հանձնարարությամբ մեկ ամսվա ընթացքում պետք է իրականացվի առկա իրավիճակի մանրամասն վերլուծություն` սկսած բժշկական ծառայությունների առկայությունից ու մասնագետներով ապահովվածությունից մինչև տեխնիկական հագեցվածություն ու շենքային պայմաններ: Այս գույքագրման արդյունքներով առավել կհստակեցվի մարզային բուժհաստատությունների արդյունավետ կառավարման, դրանց հզորությունների և տարածքների օպտիմալացման գործընթացը:

Մարզային առողջապահական համակարգի հետագա զարգացման նպատակով 2013թ. կսկսվեն Մեղրու տարածաշրջանային բժշկական կենտրոնի նոր շենքի կառուցման և Կապանի բժշկական կենտրոնի մասնաշենքերի վերանորոգման աշխատանքները: Կարդիականացվեն նաև Ալավերդու, Աբովյանի և Բերդի բժշկական կենտրոնները: Իսկ Վանաձորում կկառուցվի 190 մահճակալ հզորությամբ երրորդ մակարդակի բազմաֆունկցիոնալ բժշկական նոր կենտրոն:

Դեպի մարզեր ուղղվող միջոցները հնարավորինս մեծացնելու նպատակով և հաշվի առնելով, որ մարզերի մեծ մասում արդեն առկա են նոր վերակառուցված և տեխնիկապես հագեցված ժամանակակից բժշկական հաստատություններ, 2013թ. բյուջեով նախատեսված պետական պատվերով իրականացվող հիվանդանոցային բուժօգնության համար տրամադրվող միջոցների համամասնությունը փոխվել է հօգուտ մարզերի:

Ծրագրավորված աշխատանքներ կտարվեն մարզերում նոր ծառայությունների կազմակերպման, աշխատող բժիշկների մասնագիտական որակավորման բարձրացման և բուժհաստատությունները նոր կադրերով համալրելու ուղղությամբ:

Դեղերի ոլորտ

Ոլորտում առկա խնդիրների կարգավորման նպատակով շրջանառության մեջ է դրվել «Դեղերի մասին» ՀՀ օրենքի նախագիծը:

ՀՀ առողջապահության նախարար Դ. Դումանյանը «Դեղերի և բժշկական տեխնոլոգիաների փորձագիտական կենտրոնի» ղեկավարությանը հանձնարարեց մեկ շաբաթվա ընթացքում ուսումնասիրել և պարզել, թե վերջերս ինչ պատճառով են որոշ դեղերի գները բարձրացել և դրանց վրա ներգործելու նպատակով ներկայացնել առաջարկներ:

Ֆինանսավորման արդիականացում

Համակարգին հատկացված միջոցներն առաջին հերթին որակյալ ծառայության ապահովմանը և բուժաշխատողների վարձատրմանն ուղղելու համար նախարարը կարևորեց պետական պատվերի տեղադրման հստակ սկզբունքների ամրագրումը:

Նախարարը նշեց, որ 2013թ. հայտարարվում է առողջ ապրելակերպի տարի և հանձնարարականներ տվեց միջոցառումների անցկացման ցանկ մշակելու վերաբերյալ:

Բոլոր ուղղություններով աշխատանքները տարվում են նախանշված ժամանակացույցով:

Հարցեր, պատասխաններ, մեկնաբանություններ